（十八.下）中學 － 後面嗌你
佢當晚一訓著，就比d好嘈雜嘅聲嘈醒。佢聽唔到實際係咩聲，淨係好似好多人走埋一堆，依依俄俄依依俄俄咁，一粒音都聽唔精楚。只係覺得好嘈，好似床邊有渣人咁。
呢度順帶一提，佢果時一講，我就get到佢聽到果種聲係點，因為我自己有好幾次其實都聽過。又係一班人聚埋一齊咁，係咁有聲依依俄俄，好嘈雜，但係就一粒音都講唔出係咩。後尾聽返好多人d分享，原來好多人都不約而同有過咁嘅經歷，我估，呢個就係佢地發出聲音嘅「狀態」卦。
我估啫。有類似聽過嘅巴絲歡迎share下經驗之談。
差遠左，講返我個同學先。
凌晨時份，我個同學就俾d聲嘈醒左，佢形容果時坐起身，覺得間房好熱好焗，成背脊都係汗。
就咁啫，佢都不以為然。
出房痾左篤夜尿，訓返。
第二朝，佢阿媽叫佢起身返學，仲屌佢話琴晚去邊黎，搞乜搞到個地下污糟邋遢，佢咪話落街打波之嘛。
佢望望個地下，有d鞋印響床邊，阿媽已經幫佢抹緊，無多理會，就匆匆忙忙趕左出門口先。
又一Day。
第二朝，同一樣嘅對白。
阿媽再次屌佢做乜著對鞋入屋，一面屌，一面拎塊地布幫佢抹，佢覺得有d奇怪，自己肯定無著過鞋入屋，但都無乜太大反應，趕左返學為上。
第三朝。
「喂，起身喇！話極你都唔聽！你自己搞掂去呀！」。
果日係星期六，佢唔駛返學，佢坐起身，見到有幾個鞋印響床邊，有向床頭嘅，有向門口嘅，好似有人企過響床邊幾個位置咁。
佢好肯定自己無著過鞋入房，佢再哄近地板睇睇…佢發現，鞋印個size係偏細嘅，自己著開9號波鞋，一定無呢種size嘅鞋款。
個鞋印…
似係女仔腳。
仲要係左右偏窄嘅女仔腳。
嘩！佢即刻嚇一嚇，成屋得佢同阿媽住。佢即刻跑去攞阿媽對鞋黎拚拚，Size完全唔一樣，阿媽鞋較大，而且阿媽得對波鞋，同涼鞋，佢睇返，兩對鞋底嘅條紋同地板上嘅鞋印都係完全不能吻合。
佢當然唔敢出聲，快手用濕布抹左去算數。
當然個心梗係戚戚然忐忐忑忑咁啦，當晚，佢臨訓前特登重頭check多一次，床邊乾乾淨淨無污積先上床訓覺。
無幾耐，佢又再次比果d好嘈好嘈嘅依依俄俄聲吵醒。D聲好近好近，好似響佢床邊有渣人，企係到講野咁。
擘大眼坐起身，成頭大汗。
心跳得好快。
四周寂靜。
第一時間佢做嘅，係哄落地板到睇睇，會唔會再有果d來歷不明嘅鞋印⋯ 「哈哈！超！自己嚇自己啫！」佢睇睇地板，放心曬，無事。
大覺再訓。
第日朝早，佢突然俾阿媽一下驚呼聲嚇醒。
乜事？
佢衝落床，一睇，佢都當堂嚇呆左。
一訓醒，成屋都係鞋印，同一大小，同一底紋嘅女仔腳鞋印。
佢細心一睇，見住d鞋印由大門口一個一個行入屋裡面。
佢就跟住d鞋印行呀行，行呀行⋯
一路行到入自己間房⋯床邊⋯
鞋印一踏一踏，最令佢覺得離奇不可思議嘅係，d鞋印由房間行到床邊，再從床邊延伸上牆身，一個兩個三個，直到天花板，企定⋯兩個印。 ⋯剛好響佢床頭訓覺位置嘅正上面。
我聽到果陣都覺得毛骨悚然。
佢兩母子果排直頭唔敢返去住，最後搵到個師父黎睇屋企，燒返d野做返場法事，先至叫做無事。
Found out 返，當然就係佢果日係摩士公園隨地小便唔覺意冒犯到果到嘅「朋友」之過，然後叫左佢個名一聲，跟左佢返屋企。
所以話，唔好貪快，行多兩步啦。
小小個人分享，如果聽到有人嗌你個名，你應左，以小弟微薄嘅所見所聞，通常有以下兩個情況係最多出現：
一，就係跟左你返去。
二，就係你一擰轉頭，會見到一個人，企響你後面，好疑慮咁望住你嗌你。而呢個人，係同你自己⋯長得一模一樣。
我覺得後者呢個真係好恐怖。
呀！咁仲有第三類情況嘅，就係⋯乜事都無，聽錯啫。
有作家講話「天黑莫回頭，背後不是人」，我就無咁文皺皺嘅形容喇。
我只可以奉勸大家，三更半夜無啦啦有人嗌你個名，千祈千祈千祈，唔好應機。
唔小心應左，我祝大家係第三種可能啦。
聽錯啫，無事無事。
#離奇 #鬼故 #鬼 #靈異 #不可思議 #高登 #靈異事件勿語 #離奇家遮 #isee #ghost #horror #scary #852 #hkig #hongkong #read #book #style #writer #donotsayhello
Search